«Milliy sport mukofoti-2018» tantanali taqdirlash marosimida «Yilning eng yaxshi ayol sportchisi» yo‘nalishida Svetlana Radzivil g‘olib bo‘ldi.

Qayd etish lozimki, yengil atletikachimiz uchun yil nafaqat omadli, balki o‘ziga yarasha qiyin ham bo‘ldi. Svetlana ona bo‘ldi, yana mashg‘ulotlarga qaytdi va katta sportda muvaffaqiyat qozondi. Balandlikka sakrash bahslarida yurtimiz sharafini himoya qiladigan Radzivil Jakartada Osiyo o‘yinlari rekordini yangilagan holda, ushbu musobaqaning uch karra g‘olibasiga aylandi.

«Ana shunday katta tadbirda yilning eng yaxshisi bo‘lish men uchun sharaf. Juda yoqimli bo‘ldi. Men doimo o‘z ustimda ishlab, xalqaro musobaqalarda O‘zbekiston sharafini munosib himoya qilishga harakat qilaman. Ona bo‘lib sportga qaytganimdan so‘ng bunday natijaga erishish oson bo‘lgani yo‘q. Ammo, barchasi o‘ylaganimdek bo‘ldi. Mehnatimni ana shunday taqdirlagani uchun Milliy olimpiya qo‘mitasidan minnatdorman. Ushbu nominasiyada nomzod bo‘lishning o‘zi yutuqdir. G‘olib bo‘lish esa katta muvaffaqiyat hisoblanadi. Barcha sportchilarni hurmat qilaman. Biz o‘z ishimizning ashaddiy muxlislarimiz. Yangi yilda barchaga muvaffaqiyat, sog‘liq, kuch tilayman. Ahir bizni «lisenziyalar yili» kutmoqda. Unda Tokio 2020 Olimpiya o‘yinlariga yo‘llanma beruvchi musobaqalar bo‘ladi», – dedi Svetlana Radzivil.