“O‘FA va O‘zPFL tomonidan o‘tkaziladigan musobaqalarda ishtirok etuvchi futbol klublarini lisenziyalash va professional futbol klubi maqomini belgilash bo‘yicha reglament” ishlab chiqilgani va uning O‘FA Ijroqo‘mi byurosi tomonidan tasdiqlanganidan xabaringiz bor.

Ta’kidlanganidek, PFL mazkur reglament asosida futbol klublarini kelasi mavsum uchun tayyorlab bormoqda. Klublar oldiga qo‘yilayotgan eng asosiy talablardan biri akademiyaga ega bo‘lish sanaladi. Shuningdek, har bir klub o‘z uy uchrashuvlarini o‘tkazadigan stadion maydoni yaxshi holatda bo‘lishini ta’minlashi shart.

Aynan mana shu borada olib borilayotgan ishlar bilan yaqindan tanishish maqsadida PFLning maxsus ishchi guruhi Qo‘qon va Namanganda bo‘ldi. 

“Qo‘qon-1912” klubi akademiya bo‘yicha talabni bajarish uchun uy stadioniga yaqin hududda hozircha tashlandiq yotgan futbol maydonini o‘z qaramog‘iga olib, o‘sha yerda zamonaviy futbol maydonlari va yotoqxona barpo etish borasida ish olib borilayotgani ma’lum bo‘ldi. Klub kelasi oyga qadar akademiya bo‘yicha talabni to‘liq bajarishni mo‘ljallamoqda. 

Shuningdek, “Markaziy” stadionini talab darjasida bo‘lishi uchun harakatlar davom etmoqda. “Markaziy” stadion chimi to‘lig‘icha yangilanadi. Ayni paytda texnikalar yordamida eski chim ko‘chirilib, maydonni yangi chim o‘rnatish uchun tayyor holatga keltirilmoqda. Maydonga zamonaviy sug‘orish tizimi o‘rnatildi. Yaqin vaqt ichida yangi chim o‘tkazish jarayoni boshlanishi ko‘zda tutilmoqda. Qolaversa, stadionning ayrim sektorlaridagi taxtadan yasalgan o‘rindiqlar zamonaviy plastmassa o‘rindiqlarga almashtirilishi lozim.

Ta’kidlash joizki, Qo‘qondagi “Markaziy” stadion projektorlari yoritish quvvati “Stadionlar bo‘yicha nizom” talablariga javob bermaydi. Shu sababdan klub yaqin vaqt ichida yoritish tizimini tavsiya bo‘yicha – 1500 lyuksga yetkazish ustida ish olib bormoqda. 

Shuningdek, Namanganga tashrif buyurgan ishchi guruh “Navbahor” jamoasida olib borilayotgan ishlar bilan ham tanishdi. Ma’lum bo‘lishicha, klub yaqin vaqt ichida O‘FA huzuridagi viloyat bolalar-o‘smirlar hududiy futbol akademiyasi bilan shartnoma imzolaydi. 

Shu bilan bir qatorda asosiy o‘yinlar o‘tadigan “Markaziy” o‘yingohda ideal holatdagi chimga ega bo‘lish borasida ham ish olib borilmoqda. Chimni Gollandiyadan olib kelish ko‘zda tutilgan. Chimni hamisha yaxshi holatda ushlab turish uchun unga mavsum davomida ham yaxshilab parvarish lozim bo‘ladi. Shuni inobatga olib, sug‘orish tizimini ham italyan texnologiyasi asosida yangilandi.  Tez orada chim o‘tkazish jarayoni boshlanishi lozim.