Ertaga «Devis Kubogi» pley-off bosqichi doirasida O‘zbekiston hamda Serbiya terma jamoalari o‘rtasidagi uchrashuv boshlanadi.

Bugun ana shu uchrashuvda qaysi juftliklar o‘rtasida o‘yinlar o‘tkazish bo‘yicha qur’a tashlash marosimi bo‘lib o‘tdi.

Unga ko‘ra, O‘zbekiston – Serbiya qarama-qarshiligini Sanjar Fayziyev hamda Dushan Layovich o‘rtasidagi uchrashuv boshlab beradi. Ushbu bahs yakuniga yetgach, Denis Istomin raqiblar tennischisi Filip Krayinovichni sinovdan o‘tkazadi.

2 fevral kuni esa uchta o‘yin bo‘lib o‘tadi. Kunning dastlabki uchrashuvida Fayziyev/Istomin tandemi Miloyevich/Troiski juftligi bilan bahs olib boradi. Keyin esa Denis Istomin Dushan Layovich bilan, Sanjar Fayziyev Filip Krayinovich bilan bahs yuritadi.

Ma’lumot uchun, o‘yinlar uch setlik tizimda o‘tkaziladi. Bahslar davomida videotakrorlardan ham foydalanishi kutilmoqda.

Bellashuvlar «Sahovat sport servis» («O‘zbekiston») sport majmuasida tashkil etiladi. Uchrashuvga kirish bepul. Tennischilarimizni qo‘llab-quvvatlang!