Turkiyaning Antaliya shahrida o‘quv-mashg‘ulot yig‘inini o‘tkazayotgan Bekobodning “Metallurg” jamoasi bugun ikkinchi nazorat uchrashuvini o‘tkazadi. Bugungi raqib anchagina jiddiy – Bolgariyaning 31 karra chempioni, 11 marta mamlakat kubogi, 13 marta harbiylar kubogi, 4 marta Bolgariya Superkubogini qo‘lga kiritgan Sofiya shahrining SSKA jamoasidir.

SSKA 1948 yilning 5 may sanasida tashkil etilgan. Aslida jamoa 1923 yildan faoliyat yuritib kelgan “Atletik Slava”, 1944-48 yillarda “Chavdar” nomi bilan yuritilgan klub bazasida tashkil etilib, ikki yil mobaynida SDV nomi ostida o‘ynadi. Keyinchalik jamoa nomini “Narodna voyska”, SDNV, “Sofiya garnizoni termasi”, SDNA, SFKA nomlariga o‘zgartirdi. 1989/90 yilgi mavsumdan e’tiboran SSKA nomida faoliyat yuritib kelmoqda.

SSKA juda nomdor klub ekanligini yuqorida sanab o‘tgan unvonlaridan bilib olish mumkin. Klub jami 59 ta sovrinni qo‘lga kiritgan. Shuningdek, xalqaro maydonlarda ham muvaffaqiyatli qatnashgan. Yevropa chempionlari kubogining ikki karra yarim finalchisi, bir martadan Kubok egalari kubogi hamda UYEFA kuboklarida ham ½ finalda o‘ynagan. SSKAni “Ko‘hna qit’a”da “chempionlar kushandasi” deb ta’riflashadi. Chunki, aksariyat mavsumlarda Yevropaning eng nomdor jamoalarini nufuzli turnirlarda mag‘lubiyatga uchratib, dovrug‘ taratgan.