“Bunyodkor” akademiyasi tarbiyalanuvchisi, 2015 yildan buyon asosiy tarkib futbolchisi hisoblangan Rustam Ashurmatov endilikda Koreya chempionati ishtirokchisi “Gvangju” klubi futbolchisiga aylandi.

2015 yilda “Bunyodkor” asosiy tarkibida debyut o‘yinini o‘tkazgan iqtidorli futbolchi o‘tgan to‘rt mavsumda chempionatda 91 o‘yin, O‘zbekiston kubogida 19 o‘yin va Osiyo Chempionlar ligasida 13 o‘yinda “qaldirg‘ochlar” sharafini himoya qildi. Ashurmatov besh marta raqiblar darvozasini ishg‘ol qilishga ham muvaffaq bo‘ldi, shulardan ikki gol o‘tgan mavsumda raqiblar darvozasiga kiritildi.

Rustamjon Ashurmatov o‘smirlar o‘rtasidagi Osiyo va Jahon chempionatlarida O‘zbekiston sharafini himoya qilgan. 2018 yil yanavrida Xitoyda o‘tkazilgan Yoshlar o‘rtasida (U-23) Osiyo chempionatida esa qit’a chempionligini qo‘lga kiritdi.

Shuningdek, Rustamjon Ashurmatov O‘zbekiston milliy terma jamoasi safida ham bir qator o‘rtoqlik o‘yinlarida maydonga tushib, bosh jamoamiz tarkibida ham besh o‘yinda yurtimiz sharafini himoya qildi.

O‘zining yorqin o‘yinlari bilan muxlislar e’tiborini qozongan Rustam Ashurmatov, koreyalik mutaxassislarni ham qiziqtirib qo‘ydi va ular taklif bilan chiqishdi. Ushbu taklifni har tomonlama ko‘rib chiqqan “Bunyodkor” klubi rahbariyati hamda Rustam Ashurmatov ushbu taklifga rozilik berishdi va futbolchi “Gvangju” klubi bilan ikki yillik shartnomaga imzo chekdi.

Ma’lumot uchun, "Gvangju" Janubiy Koreya K-2 ligasida ishtirok etadi. "K-2" ligasida yangi mavsum 2 mart kuni start oladi.