“Бунёдкор” академияси тарбияланувчиси, 2015 йилдан буён асосий таркиб футболчиси ҳисобланган Рустам Ашурматов эндиликда Корея чемпионати иштирокчиси “Гвангжу” клуби футболчисига айланди.

2015 йилда “Бунёдкор” асосий таркибида дебют ўйинини ўтказган иқтидорли футболчи ўтган тўрт мавсумда чемпионатда 91 ўйин, Ўзбекистон кубогида 19 ўйин ва Осиё Чемпионлар лигасида 13 ўйинда “қалдирғочлар” шарафини ҳимоя қилди. Ашурматов беш марта рақиблар дарвозасини ишғол қилишга ҳам муваффақ бўлди, шулардан икки гол ўтган мавсумда рақиблар дарвозасига киритилди.

Рустамжон Ашурматов ўсмирлар ўртасидаги Осиё ва Жаҳон чемпионатларида Ўзбекистон шарафини ҳимоя қилган. 2018 йил янаврида Хитойда ўтказилган Ёшлар ўртасида (U-23) Осиё чемпионатида эса қитъа чемпионлигини қўлга киритди.

Шунингдек, Рустамжон Ашурматов Ўзбекистон миллий терма жамоаси сафида ҳам бир қатор ўртоқлик ўйинларида майдонга тушиб, бош жамоамиз таркибида ҳам беш ўйинда юртимиз шарафини ҳимоя қилди.

Ўзининг ёрқин ўйинлари билан мухлислар эътиборини қозонган Рустам Ашурматов, кореялик мутахассисларни ҳам қизиқтириб қўйди ва улар таклиф билан чиқишди. Ушбу таклифни ҳар томонлама кўриб чиққан “Бунёдкор” клуби раҳбарияти ҳамда Рустам Ашурматов ушбу таклифга розилик беришди ва футболчи “Гвангжу” клуби билан икки йиллик шартномага имзо чекди.

Маълумот учун, "Гвангжу" Жанубий Корея K-2 лигасида иштирок этади. "К-2" лигасида янги мавсум 2 март куни старт олади.