Yangi mavsumga tayyorgarlikni Turkiyaning Antaliya shahrida o‘tkazayotgan Namanganning “Navbahor” klubi mazkur yig‘in doirasidagi so‘nggi nazorat –sinov bahsini bugun Ukrainaning “Oleksandriya” jamoasiga qarshi o‘tkazib, 1:2 hisobida mag‘lubiyatga uchradi.
“Lochinlar”ning goliga Zafar To‘rayev mualliflik qildi. Ta’kidlash joizki, ushbu o‘rtoqlik uchrashuvida hisobni ukrainaliklar ochishgandi.
Keyin Andrey Kanchelskis shogirdlari muvozanatni tiklashdi va jamoalar tanaffusga 1:1 hisobidagi durang bilan chiqib ketishdi.
Ikkinchi bo‘limda “Oleksandriya” klubi futbolchilari yana bitta gol urib,
2:1 hisobida g‘alaba qozonishga muvaffaq bo‘lishdi.
Mazkur o‘yinda “Navbahor” tarkibida quyidagi futbolchilar harakat qilishdi: O‘tkirbek Yusupov, Igor Golban, Jahongir Mehmonov, Mirzohid G‘ofurov, Slavko Lukich, Abdujamol Isroilov, Zafar To‘rayev, Shahzod Shaymanov, Abbos G‘ulomov, Aleksandr Kasyan, Ivan Solovyov.
Zaxiradan maydonga tushganlar: Bahodir Nasimov, Azim Ahmedov, Jasur Azimov. Jamoamiz a’zolari Turkiyadagi o‘quv-mashg‘ulot yig‘inini 17 fevral kuni yakunlab, yurtimizga qaytishadi.
Shundan so‘ng, futbolchilarga qisqa muddatli tanaffus beriladi va yangi mavsum arafasidagi so‘nggi yig‘in Namanganda o‘tkaziladi.
