Xabar berganimizdek, shu kunlarda Bolgariyaning Ruse shahrida sport kurashlari bo‘yicha “Dan Kolov” nomli xalqaro musobaqa bo‘lib o‘tmoqda. Unda ishtirok etayotgan O‘zbekiston terma jamoasi vakillari ham yuqori probali medallar uchun kurashmoqda.

Ayni paytga kelib, musobaqaning erkin kurash yo‘nalishi bo‘yicha 3 ta vaznda finalchilar aniqlandi. Quvonarlisi, ularning birida hamyurtimiz Bekzod Abdurahmonov ham chempionlik uchun gilamga chiqadi. 2 karra Osiyo o‘yinlari g‘olibi hisoblanmish Abdurahmonovning hal qiluvchi bahsdagi amerikalik Jordan Barrouz bo‘ladi.

Kurashchilar shu paytgacha 2 bor to‘qnash kelishgan. Dastlabki qarama-qarshilik Rio Olimpidasiga to‘g‘ri kelib, unda yurtdoshimiz 11:1 hisobida ustun kelgandi. Oradan bir yil o‘tib Las-Vegasdagi jahon chempionatida Barrouz 6:5 hisobida g‘alaba qozongan. Ta’kidlash joiz, Barrouz hisobida London Olimpiadasi va jahon chempionatlarining 4 ta oltin medali mavjud.

Shuningdek, -57 kilogramm vazn toifasida kurashayotgan G‘ulomjon Abdullayev bronza medali uchun bahsda o‘z omadini sinab ko‘radi. Qizlarimizdan Baxtigul Boltaniyozova (-68 kg) ham final yo‘llanmasini qo‘lga kiritgan bo‘lib, uning raqibasi AQSH vakilasi Tamira Mensa bo‘ladi.