Bugun, 10 martdan 11 mart kuniga o‘tar kechasi Namangan viloyati To‘raqo‘rg‘on tumanida “Neksiya” va “Damas” avtomashinalari ishtirokida mudhish yo‘l-transporti hodisasi sodir bo‘ldi.

Fojiali YTH natijasida 4 kishi halok bo‘lgan. Bu haqda Worldnews.uz axborot agentligi xabar bermoqda.

Worldnews.uz axborot agentligiga ma’lum qilinishicha, ularning 2 nafari “Navbahor” futbol klubi muxlislari, yana ikki nafari qarama-qarshi tomonga harakatlanib ketayotgan “Damas” avtomashinasidagi yo‘lovchilar bo‘lgan.

“Neksiya”da bo‘lgan “Navbahor” jamoasining 5 nafar muxlisi Superliganing 1-tur doirasida “Qo‘qon-1912”ga qarshi o‘yinni Toshkentdagi TTYMI stadionida tomosha qilib, Namanganga qaytayotgan edi.

Biroq taqdir taqazosi bilan ular “Qo‘qon-1912” bilan bo‘lib o‘tgan asabiy o‘yindan keyin kutilmaganda shunday holatga tushib qolishdi. Hodisa “Angor” post yaqinida sodir bo‘ldi, mashinalar yonib ketgan. “Neksiya”dagi yana 3 nafar muxlis ayni vaqtda komada.

O‘yin Toshkentda emas, balki vodiydagi stadionlarning birida o‘tkazilganida, muxlislarning taqdiri mana shunday fojiali yakunlanmagan bo‘lar edi. Biz bugun 2 nafar ashaddiy futbolimiz muxlisini yo‘qotdik.

Agar bu o‘yin Namanganda o‘tkazilganida o‘sha 2 kishi oila davrasiga tirik qaytarmidi... PFLni aybi bor sal bo‘lsa ham bu vaziyatda”, deydi YTHda halok bo‘lgan muxlislarga yaqin manba.

Avvalroq ushbu o‘yin “Navbahor” jamoasining maydoni tayyor emasligi sabab Farg‘onadagi “Istiqlol” stadionida o‘tkazilishi kerak edi.

Ammo “Navbahor” “Istiqlol” stadionini emas TTYMI stadionini tanladi. Aksiga olib, bugungi kunda “Qo‘qon-1912” jamoasining uy stadioni ham yangi mavsumga tayyor emas.

10 mart kuni bo‘lib o‘tgan “Navbahor” – “Qo‘qon-1912” o‘rtasidagi o‘yin 1:1 hisobida yakuniga yetdi. O‘yinda muxlislar va mehmon klub futbolchilari o‘rtasida ziddiyatli vaziyat ham kuzatildi.

Ya’ni, “Navbahor” muxlislari “Qo‘qon-1912” futbolchilari tomonidan amalga oshirilgan “provokasion” harakatlarga qarshi ular tomonga har xil buyumlar uloqtirishgan. Uloqtirilgan buyumlar orasida plastmas truba ham bor edi.

Ma’lumot o‘rnida, O‘zbekiston Professional futbol ligasi o‘yinlarni qabul qilishga tayyor bo‘lmagan jamoalarga stadion tanlash huquqini taqdim etgan.

Izoh: Yuqoridagi suratda ushbu YTHda halok bo‘lgan "Navbahor"ning ikki muxlisi.