«Ayaks» klubi yarim himoyachisi Frenki de Yong yangi mavsumdan boshlab «Barselona» jamoasida to‘p suradi. Futbolchi bu transferga rozilik bildirishidan oldin kim bilan maslahatlashganini aytib o‘tdi.
«Men Gollandiya terma jamoasi bosh murabbiyi Ronald Kumandan ko‘p narsa haqida so‘rayman. Uning «Barselona» klubidagi yutuqlarini ko‘p eshitganman. Men uning shahar, kundalik hayot tarzi va klub haqidagi fikrlarini bilmoqchi edim. Bu narsalarni oldindan bilsang o‘zingni sokinroq his qilasan.
Ha, men u bilan maslahatlashdim. Men bu ishni har terma jamoa yig‘iniga kelganimda amalga oshirdim. Ularning menga bo‘lgan qiziqishi haqida mish-mishlar bo‘lgan edi va shuning uchun ham Ronald Kumanning bu haqidagi fikrni bilmoqchi bo‘ldim.
Kuman menga qayerda doimiy o‘yin amaliyoti bo‘lsa, o‘sha yerga borish kerakligini aytdi. Qayerga ekanligi muhim emas, asosiysi - o‘ynash», - deydi de Yong.
