UYEFA hakamlarni tanqid qilgan «PSJ» hujumchisi Neymar ustidan intizomiy ish ochdi va unga ayblov e’lon qildi.
Avvalroq, futbolchi Chempionlar Ligasi 1/8 finalidan o‘rin olgan «Manchester Yunayted»ga (1:3) qarshi bahsda ishlagan Damir Skomina boshchiligidagi hakamlar to‘g‘risida: «Sharmandalik, VAR`dagi to‘rt kishi futbolni umuman tushunmaydi», deb yozgan edi.
Eslatib o‘tamiz, bosh hakam o‘yinning so‘nggi daqiqasida VAR orqali «PSJ» darvozasiga penalti belgilagan, uning aniq amalga oshirilishi natijasida parijliklar musobaqani tark etishgan edi.
Sport xabariga ko‘ra, bu so‘zlari uchun braziliyalik to‘purar 1-3 o‘yinga diskvalifikasiya qilinishi mumkin.
Eslatib o‘tamiz, ayni paytda Neymar jarohatini davolash bilan shug‘ullanmoqda. Uning aprel oyining oxirida maydonga qaytishi kutilyapti.
