УЕФА ҳакамларни танқид қилган «ПСЖ» ҳужумчиси Неймар устидан интизомий иш очди ва унга айблов эълон қилди.

Аввалроқ, футболчи Чемпионлар Лигаси 1/8 финалидан ўрин олган «Манчестер Юнайтед»га (1:3) қарши баҳсда ишлаган Дамир Скомина бошчилигидаги ҳакамлар тўғрисида: «Шармандалик, VAR`даги тўрт киши футболни умуман тушунмайди», деб ёзган эди.

Эслатиб ўтамиз, бош ҳакам ўйиннинг сўнгги дақиқасида VAR орқали «ПСЖ» дарвозасига пенальти белгилаган, унинг аниқ амалга оширилиши натижасида парижликлар мусобақани тарк этишган эди.

Sport хабарига кўра, бу сўзлари учун бразилиялик тўпурар 1-3 ўйинга дисквалификация қилиниши мумкин.

Эслатиб ўтамиз, айни пайтда Неймар жароҳатини даволаш билан шуғулланмоқда. Унинг апрель ойининг охирида майдонга қайтиши кутиляпти.