Bugun Chirchiqdagi O‘zbekiston Davlat jismoniy tarbiya va sport universitetining manejida og‘ir atletika bo‘yicha mamlakat chempionati start oldi.
Kattalar o‘rtasida tashkil qilingan mazkur musobaqada 300dan ortiq polvonlar o‘z mahoratini namoyish etadi.
An’anaga muvofiq, bugun musobaqaning tantanali ochilish marosimi bo‘lib o‘tdi. Unda O‘zbekiston Milliy Olimpiya qo‘mitasi, O‘zbekiston og‘ir atletika federasiyasi mutasaddi rahbarlari, keng sport jamoatchiligi va qator OAV xodimlari ishtirok etdi. Tadbir davomida O‘zbekiston MOQ prezidenti maslahatchisi Nazirjon Xudoyqulov so‘zga chiqib, musobaqa ishtirokchilariga omad tiladi.
Shuningdek, tantanali ochilish marosimida 8-15 mart kunlari AQSHning Las-Vegas shahrida o‘tkazilgan og‘ir atletika bo‘yicha o‘smirlar o‘rtasidagi JCH g‘olib va sovrindorlari munosib taqdirlanishdi.
Mazkur O‘zbekiston chempionati 2 aprel kuniga qadar davom etadi. Unda muxlislar Rustam Jangaboyev, Doston Yoqubov, Adhamjon Ergashev, Akbar Jo‘rayev, Kumushxon Fayzullayeva kabi ko‘plab jahon va Osiyo chempionati sovrindorlarining chiqishlaridan bahramand bo‘lishlari mumkin.
