Бугун Чирчиқдаги Ўзбекистон Давлат жисмоний тарбия ва спорт университетининг манежида оғир атлетика бўйича мамлакат чемпионати старт олди.
Катталар ўртасида ташкил қилинган мазкур мусобақада 300дан ортиқ полвонлар ўз маҳоратини намойиш этади.
Анъанага мувофиқ, бугун мусобақанинг тантанали очилиш маросими бўлиб ўтди. Унда Ўзбекистон Миллий Олимпия қўмитаси, Ўзбекистон оғир атлетика федерацияси мутасадди раҳбарлари, кенг спорт жамоатчилиги ва қатор ОАВ ходимлари иштирок этди. Тадбир давомида Ўзбекистон МОҚ президенти маслаҳатчиси Назиржон Худойқулов сўзга чиқиб, мусобақа иштирокчиларига омад тилади.
Шунингдек, тантанали очилиш маросимида 8-15 март кунлари АҚШнинг Лас-Вегас шаҳрида ўтказилган оғир атлетика бўйича ўсмирлар ўртасидаги ЖЧ ғолиб ва совриндорлари муносиб тақдирланишди.
Мазкур Ўзбекистон чемпионати 2 апрель кунига қадар давом этади. Унда мухлислар Рустам Жангабоев, Достон Ёқубов, Адҳамжон Эргашев, Акбар Жўраев, Кумушхон Файзуллаева каби кўплаб жаҳон ва Осиё чемпионати совриндорларининг чиқишларидан баҳраманд бўлишлари мумкин.
