Ispaniya chempionatining 31-turi doirasida jadvalda yuqori ikkita o‘rinni egallab turgan jamoalar to‘qnash kelishdi. "Atletiko" "Kamp Nou"da "Barsa"ni mag‘lub etsa, chempionlik uchun intrigani yuzaga keltirishi mumkin edi.

Tomonlar o‘yinni ancha faol boshlashdi. Biroq bahsning 29-daqiqasida Diyego Kosta kerak bo‘lmagan joyda hakamni so‘kdi va qizil kartochka olib maydonni tark etdi. Shundan so‘ng mehmonlar ko‘proq himoya haqida o‘ylay boshlagan bo‘lsalar, Valverde shogirdlari esa xotirjamlikka berilishdi.

O‘yin davomida kataloniyaliklar raqib darvozasi tomon ko‘plab zarbalar berishdi. Yan Oblak zarbalarning deyarli barchasini qaytargan bo‘lsa, bir vaziyatda Albaning zarbasidan keyin to‘p ustunga tegib qaytdi. O‘yin tugashiga 5 daqiqa qolganidan Luis Suares tomonidan 18 metrlardan yo‘llangan zarbani "Atletiko" posboni qaytara olmadi. Oradan 1 daqiqa o‘tib esa "ko‘k-anorranglilar" qarshi hujum tashkil qilishdi va Messi raqib darvozasiga ikkinchi to‘pni kiritdi.

Shu tariqa, "Barselona" ikkinchi o‘rindagi "Atletiko" bilan ochkolar farqini 11taga yetkazgan bo‘lsa, "Real" hamshaharlaridan bor-yo‘g‘i 2 ochko ortda qolmoqda.

Ispaniya La ligasi, 31-tur
Barselona – Atletiko 2:0 (0:0)
Gollar: 1:0 – 85 Suares, 2:0 – 86 Messi.
Barselona – ter Shtegen, Pike, Serdji Roberto (Nelson Semedu, 84), Langle, Alba, Artur (Malkom, 63), Buskets, Rakitich, Koutinyo (Alenya, 80), Messi, Suares.
Atletiko – Oblak, Ximenes, Godin, Filipe Luis (Morata, 58), Aryas (Korrea, 35), Saul, Koke, Parti, Rodri Ernandes (Xuanfran, 88), Diyego Kosta, Grizmann.
Ogohlantirishlar: Parti (27), Ximenes (28), Godin (29), Saul (71), Pike (74), Langle (78), Suares (86).
Chetlatish: Diyego Kosta (28).