Bir necha kun avval Xalqaro dzyudo federasiyasi o‘z taqvim rejasiga o‘zgartirish kiritgani va unga muvofiq “Katta dubulg‘a” turnirlari orasiga Brazilia turniri ham qo‘shilgani haqida xabar bergan edik. Shu munosabat bilan jahon chempionatidan so‘ng o‘tadigan ayrim musobaqalar taqvimida yana kichik o‘zgarishlar ro‘y berdi.

Biz uchun e’tiborlisi, ular orasida Toshkentda bo‘lib o‘tadigan Gran-prining sanasi o‘zgargani. Xalqaro tashkilotning yil boshida ma’lum qilgan taqvimiga ko‘ra, musobaqa noyabr oyida o‘tishi belgilangan edi. Biroq so‘nggi yangilangan taqvimga ko‘ra, poytaxtimiz mezbonligida kechadigan bahslar 20-22 sentyabr kunlariga o‘zgartirildi.

Shu tariqa Toshkent Gran-prisi jahon chempionatidan so‘ng o‘tadigan dastlabki yirik turnir sifatida belgilanmoqda. Unda kelasi yil bo‘lib o‘tadigan Tokio Olimpiadasiga qimmatli reyting ochkolari o‘ynalishi yana bir muhim jihatdir. Eslatib o‘tamiz, Gran-pri musobaqasida shohsupaga ko‘tarilgan dzyudochilar o‘rinlariga qarab mos ravishda 700-490-350 reyting ochkolariga ega bo‘lishadi.