Bugun poytaxtimizda dzyudo bo‘yicha o‘smirlar va yoshlar o‘rtasida Osiyo ochiq kubogi start oldi. Unda 6 mamlakatdan tashrif buyurgan 250 ga yaqin dzyudochilar g‘oliblik uchun bahs olib borishadi.

Biroz avval “Universal” sport majmuasi mezbonlik qilayotgan mazkur turnirning ochilish marosimi bo‘lib o‘tdi.

Unda O‘zbekiston Milliy olimpiya qo‘mitasi, O‘zbekiston jismoniy tarbiya va sport vazirligi, O‘zbekiston dzyudo federasiyasi vakillari, shuningdek, keng sport jamoatchiligi va OAV xodimlari ishtirok etishdi. Ochilish marosimida O‘zbekiston Milliy olimpiya qo‘mitasi nomidan Bosh kotib Jasur Matchanov so‘zga chiqdi.

“Mahoratli dzyudochimiz Uchqun Murodonov xotirasiga bag‘ishlab har yili an’anaviy tarzda tashkil qilinadigan mazkur musobaqa bu gal o‘zgacha ruhda o‘tmoqda. Bu musobaqaning ahamiyati shundaki, unda har yili yosh va iqtidorli dzyudochilarni kashf qilinadi. Shuningdek, murabbiylarimiz bu turnir orqali sportchilarning jismoniy holatini yana bir bor ko‘zdan kechirib olishadi. Fursatdan foydanalib, ushbu Osiyo ochiq kubogida ishtirok etayotgan barcha yosh dzyudochilarga omad va zafarlar tilab qolaman.”, – dedi Jasur Matchanov.

Musobaqaning eng so‘nggi natijalari bilan O‘zbekiston Milliy olimpiya qo‘mitasining rasmiy saytida tanishib borasiz.