Ispaniya chempionatining 33-turi doirasida "Barselona" o‘z maydonida "Real Sosyedad"ni qabul qildi. Kataloniyaliklar Yevropa chempionlar ligasida "MYU" to‘sig‘idan o‘tganidan keyin jamoaning ishtiyoqi bu safar u qadar yuqori bo‘lmadi.

Birinchi bo‘limda basklar hisobni ochishlari mumkin edi. Ammo Xuanmi tomonidan yakkama-yakka vaziyatda yo‘llangan xavfli zarbani Ter Shtegen qaytarishga muvaffaq bo‘ldi. Jamoalar tanaffusga chiqib ketish oldidan mezbonlar burchak to‘pini o‘yinga kiritishdi va Kleman Langle bosh bilan raqib darvozasini ishg‘ol qildi.

Mehmonlar ikkinchi bo‘limni faol boshlashdi va 62-daqiqaga kelib hisobni tenglashtirishdi. Futbolchilar orasidan yetkazilgan uzatmani yana o‘sha Xuanmi bu safar golga aylantirdi.

Oradan 2 daqiqa o‘tib "ko‘k-anorranglilar" hisobda oldinga o‘tib olishdi. Messining uzatmasidan keyin Alba chap qanotdan jarima maydonchasiga kirdi va 15 metrlardan o‘ng oyoqda zarba berdi. "Sosyedad" posboni zarbani qaytara olmadi.

Qolgan daqiqalarda Valverde jamoasi mehmonlarga nisbatan yaxshiroq harakat qildi va g‘alabani saqlab qoldi. "Barsa" "Atletiko" bilan oradagi 9 ochkolik farqni saqlab qoldi.

Ispaniya La ligasi, 33-tur
Barselona – Real Sosyedad 2:1 (1:0, 1:1)
Gollar: 1:0 – 45 Langle, 1:1 – 62 Xuanmi, 2:1 – 64 Alba.
Barselona – ter Stegen, Nelson Semedu, Pike, Langle, Alba, Vidal (Serdji Roberto, 90), Rakitich, Artur (Buskets, 56), Messi, Suares, Dembele (Koutinyo, 72).
Real Sosyedad – Ruli, Saldua, Elustondo, Lyorente (Barrenechea, 87), Munyos, Merino, Subeldiya (Sangali, 54), Pardo, Oyarsabal, Villian Joze, Xuanmi (Sandro Ramires, 87).
Ogohlantirish: Merino (15).