France Football - jahondagi eng nufuzli nashrlardan biri. Biz uni «Oltin to‘p» sovrini uchun yaxshi ko‘ramiz.
Yaqinda u joriy mavsumdagi eng ko‘p maosh olgan murabbiy va o‘yinchilar bilan tanishtirdi. Hozir murabbiylar mavzusiga to‘xtalamiz. Yuqori beshlikda kutilmagan holatga duch keldik, ammo bu haqda gapirishdan avval hozirgi reytingni mavsum-2013|2014dagisi bilan solishtirsak. Besh yil avvalgi maoshlar miqdori Forbes faktlaridan olingan, ammo boshqa manbalar ham shunga o‘xshash raqamlarni taqdim etishgan.
*** Dastlabki qiziq holat - dastlabki beshlikka Tyerri Anrining ham qo‘shilgani. France Football aniqlik kiritishicha, 25 yarim million - uch oylik maosh va iste’foga chiqarilgani uchun tovon puli. Lekin baribir, summa juda katta va tushunarsiz. «Monako»ning ushbu murabbiydan tezda qutulganini endi angladik. Natijalar yaxshilanmadi, jamoa menejmentida ham tezkor o‘zgarishlar kuzatildi.
*** Pep Gvardiola va Joze Mourinyo - har ikki reytingdan o‘rin olgan murabbiylar. Darvoqe, ularning ikkisi ham klublarini o‘zgartirishgan, ishsiz yurgan Joze esa bu mavsum ispaniyalik hamkasbidan ko‘proq maosh olgan. Qo‘shimchasiga, «MYU» uni muddatidan avval ishdan bo‘shatgani uchun tovon puli ham to‘lagan.
*** Besh yil avval eng yirik maoshlardan biri Rossiyada bo‘lgan. U milliy terma ustozi Fabio Kapelloga to‘langan - 9,5 (ayrim manbalarda 7 ko‘rsatilgan) million yevro. Mazkur jamoaning bugungi kundagi bosh murabbiyi Stanislav Cherchesov bundan ancha kam maosh oladi.
*** Diyego Simeonening «Atletiko»da ish boshlaganiga yetti yildan oshiqroq vaqt bo‘ldi. Uning nima sababdan boshqa top-klubga o‘tib ketmayotgani haqidagi savolga javobni mazkur ro‘yxatdan topish mumkin. «Atletiko» Diyegoni jahonning eng ko‘p maosh oluvchi murabbiyiga aylantirgan, boz ustiga, farq juda katta. Deylik, Joze Mourinyoning maoshi miqdori Simeonenikidan 10 millionga kam.
*** E’tibor bering, yirik miqdordagi maoshlar bir necha marta oshgan. Gvardiola besh yil avval olgan 17,6 million hozir yetakchi beshlikka kirish uchun yetarli emas. Boshqa bir qiziq holat: besh yil avval eng yirik maoshlar «Bavariya», «Chelsi», «Guanjou», Rossiya termasi va «Real»da bo‘lgan. Bu yilgi ro‘yxatda mazkur jamoalarning hech biridan vakil yo‘q.
France Football ma’lumotlariga ko‘ra, kuchli o‘nlikka shuningdek, Anchelotti, Klopp, Venger, Allegri hamda Jardim ham kirishgan.
