Xitoyning Ninbo shahrida og‘ir atletika o‘yicha navbatdagi Osiyo chemponati bo‘lib o‘tmoqda. Tokio Olimpiadasiga qimmatli reyting ochkolarini taqdim etuvchi mazkur musobaqa o‘zida qit’amizning kuchli atletlarini jamlagan.
Bugun erkaklar o‘rtasida -102 kilogramm vazn toifasida bellashuvlar o‘tkazildi. Mazkur yo‘nalishda supachaga chiqqan vakilimiz Sunattila O‘sarov dast ko‘tarish mashqida 172 kilogramm natija bilan kumush medal sohibiga aylandi.
Afsuski, siltab ko‘tarish mashqida vakilimizdan omad biroz yuz o‘girgdi. Polvonimiz ushbu mashqni 191 kilogrammli muvaffaqiyatli urinish bilan boshladi, biroq 2 va 3-urinishlarda 197 kilogramm og‘irlikdagi toshni o‘ziga bo‘y sundira olmadi. Agar urinish ko‘ngildagidek chiqqanida atletimiz ikki kurash bo‘yicha bronza medali sohibiga aylanar edi. O‘sarov shu tariqa ikki kurash bo‘yicha to‘rtinchi o‘rinni egalladi.
