Professional boksda yorqin janglari bilan muxlislar mehrini qozonib kelayotgan bokschilarimiz Shahram G‘iyosov hamda Murodjon Ahmadaliyev bugun Toshkentga qaytib kelishdi.
Barchangizga ma’lum, har ikki bokschimiz 26 aprel kuni AQSHning Kaliforniya shtatida kechgan jangda g‘alaba qozonishgan edi. E’tiborlisi, unda Shahram faoliyatidagi dastlabki titul kamari uchun ringga ko‘tarilgan va amerikalik Emmanuel Teylorni 10 raundlik jangda mag‘lub etib, “WBA Intercontinental” chempionlik kamarini qo‘lga kiritgan edi.
Bokschilarimizni kutib olish ham katta tantana bilan o‘tdi.
“Mana dastlabki chempionlik kamarimni ham yurtimizga olib keldim. Hali bu boshlanishi deb o‘ylayman. Raqibim o‘ziga yarasha kuchli bokschi edi. Shu paytgacha chempionlik kamarlari uchun 12 raundlik janglarda ringga chiqqan, 1 marta nokautga uchragan xolos. Uni ham yutib, shu muvaffaqiyatga erishdim. Bunga oilamdan, yaqinlarimdan uzoqda o‘tkazgan tinimsiz mehnat va mashg‘ulotlarim, va albatta, sizlarning duolaringiz va qo‘llab-quvvatlashlaringiz natijasida erishdim. Endi oilam bilan biroz dam olgach, yanada katta kamarlar uchun janglarga tayyorlanaman”, – dedi Shahram G‘iyosov.
“Yana bir muhim g‘alabani qo‘lga kiritganimdan xursandman. Bu bilan to‘xtab qolmayman, albatta. Hali oldinda bundan ham katta janglar bizni kutib turibdi. Nasib qilsa, o‘z vaznimning chempionlik kamarini ham yurtimizga olib kelaman”, – dedi Murodjon Ahmadaliyev.
Bokschilarimizni kutib olish marosimida MOQ Bosh kotibi Jasur Matchanov, O‘zbekiston boks federasiyasi mutasaddilari, keng sport jamoatchiligi, bokschilarning yaqinlari, OAV vakillari hamda yuzlab muxlislar ishtirok etishdi. E’tiboringizga kutib olish ushbu jarayonidan fotosuratlarni havola qilamiz:
