Ayollar o‘rtasidagi bahslarda -61 kg vazn toifasida ishtirok etgan Barno Mirzayeva bronza medalini qo‘lga kiritdi.

Birinchi uchrashuvda eronlik Altuni Neginni mag‘lub eta olgan yurtdoshimiz keyingi bahsda mezbon vakilasi Koban Mervega imkoniyatni boy berib qo‘ydi. O‘tish bahslarida Belgiya, Braziliya, Ekvador va yaponiyalik karatechilardan ustun kelgan Barno uchinchi o‘rin uchun bellashish imkoniyatini saqlab qoldi. Bronza uchun kechgan bahslarda esa tunislik Xasnau Butenani 3:0 hisobida mag‘lubiyatga uchratgan Mirzayeva uchinchi o‘rinni qo‘lga kiritdi.
 

Jamoamizga navbatdagi medalni -60 kg vazndagi Sadriddin Saymatov taqdim etdi. Chorak finalgacha Belgiya, Iordaniya, Gruziya, Eron va Gresiya vakillaridan ustun kelgan vakilimiz yarim finalga yo‘llanmasi uchun bahsda qozog‘istonlik Erkinbek Baytureshevga imkoniyatni boy berib qo‘ydi.Uchinchi o‘rin uchun kechgan bahslarda Saymatov italiyalik Andjelo Kresenzoni mag‘lub etdi.

Ma’lumot uchun, ahamiyati bo‘yicha Premyer-Liga musobaqalaridan keyin ikkinchi o‘rinda turuvchi A seriya turkumiga kiradigan xalqaro musobaqa joriy yil 4 bosqichda o‘tkazilishi rejalashtirilgan. Ikkinchisi Istanbulda uyushtirilgan ushbu nufuzli musobaqaning dastlabkisiga Zalsburg (Avstriya) mezbonlik qilgan. Keyingi bosqichlar Monreal (Kanada, 21-23 iyun) va Santyago (Chili, 20-22 sentyabr) shaharlarida o‘tkazilishi rejalashtirilgan.