Shu hafta boshida «Barselona» klubi va Ispaniya terma jamoasining sobiq yarim himoyachisi Xavi Ernandes faoliyatidagi so‘nggi o‘yinini o‘tkazdi.

39 yoshli futbolchi Osiyo Chempionlar Ligasi doirasidagi «Persepolis» (Eron) bilan uchrashuvda maydonga tushdi. O‘yin eronliklarning 2:0 hisobidagi g‘alabasi bilan yakunlandi. Avvalroq Xavi butsalarini mixga ilgach, «Al-Sadd» bosh murabbiyi sifatida ishlashi mumkinligi aytilgandi. Hattoki, u klub bilan 2020 yilgacha davom etadigan murabbiylik shartnomasi imzolashga ham ulgurgan. Eslatib o‘tamiz, 39 yoshli Xavi «Barselona» tarbiyalanuvchisi hisoblanadi. 1998-2015 yillar oralig‘ida «ko‘k-anorranglilar» libosida 769ta o‘yin o‘tkazib, klub rekordini qayd etgan. «Barsa» bilan sakkiz marta Ispaniya chempioni bo‘lgan, uch marta mamlakat kubogini olti marta Ispaniya Superkubogini qo‘lga kiritgan. Chempionlar Ligasida esa to‘rt bor bosh sovrinni boshi uzra ko‘targan. Xavi Ispaniya termasida ikki marta Yevropa chempionligini nishonlagan bo‘lsa, bir marta - 2010 yili jahon chempioni bo‘lgan.

Ushbu voqea bahona joriy mavsum yakunida futbolchilik faoliyatini tugatayotgan yoki ayrim sabablarga ko‘ra boshqa klubga yo‘l olayotgan afsonalar nomiga e’tibor qaratishga qaror qildik.