Toshkent dzyudo bo‘yicha har yili Gran-pri seriyasiga kiruvchi yirik musobaqalardan biriga mezbonlik qiladi. Shu paytgacha musobaqa “O‘zbekiston” sport majmuasida o‘tkazilgan edi. Bu yil Tokio Olimpiadasiga reyting ochkolarini taqdim etuvchi Toshkent Gran-prisini har qachongidan ham ko‘tarinki ruhda tashkil qilish maqsadida bellashuvlarni “Humo arena”da o‘tkazish rejalashtirilgan. Shu maqsadda Xalqaro dzyudo federasiyasi vakillari yangi arenani ko‘zdan kechirish va xalqaro standartlarga javob berishi borasidagi imkoniyatlarini baholash uchun poytaxtimizga tashrif buyurishdi.
Xalqaro tashkilotning musobaqa menejerlari Lisa Allan, Tural Aliyev va Abdullo Muradovdan iborat ishchi guruh “Humo arena”ning bu boradagi imkoniyatlarini yuqori baholadi va ob’ektni xalqaro dzyudo bellashuvlarini qabul qilish uchun munosib, deb topdi. Shundan so‘ng xalqaro ekspertlar bilan O‘zbekiston Milliy Paralimpiya assosiasiyada uchrashuv tashkil etildi. Suhbat davomida tomonlar Gran-pridan so‘ng o‘tkaziladigan paradzyudo bo‘yicha IBSA kubogi borasida ham atroflicha mulohaza olib borishdi.
Eslatib o‘tamiz, Toshkent Gran-prisi 20-22 sentyabr, paradzyudo bo‘yicha IBSA kubogi esa 23-24 sentyabr kunlari bo‘lib o‘tadi.
