"Barselona" klubi yangi mavsumga tayyorgarlik uchun nazorat o‘yinlarini Yaponiyada boshlaydi. "Ko‘k-anorranglilar" 23 iyul kuni Tokioda «Chelsi», 27 iyul kuni Kobe shahrida «Vissel Kobe» bilan to‘qnash kelishadi.

Keyinroq 54-marta o‘tkaziladigan Joan Gamper sovrini uchun jamoa 4 avgust kuni Yevropa ligasi finalchisi «Arsenal»ga qarshi maydonga chiqadi. "Kanonirlar" uchun esa bu Gamper kubogidagi dastlabki ishtirok hisoblanadi.

Shuningdek, yaqin kunlarda paydo bo‘lgan xabarga ko‘ra, kataloniyaliklar avgust oyida AQSHda ikkita o‘yin o‘tkazishadi. Ilk marta tashkil etilgan Ispaniya va Italiya klublari o‘rtasidagi «Primera-Seriya A» musobaqasi doirasida «Barselona» va «Napoli» jamoalari bahslashadilar.

Ernesto Valverde va Karlo Anchelotti shogirdlari Mayamidagi «Xard Rok Stedium»da to‘qnash kelishadi. Oradan 3 kun o‘tib — 10 avgust kuni esa bu jamoalar o‘rtasidagi ikkinchi o‘yin «Mishigan Stedium»da o‘tkaziladi. Ma’lumot o‘rnida: AQSHdagi bu stadionga 107.000 muxlis sig‘adi.

"Barselona"ning mavsumoldi o‘yinlari ro‘yxati quyidagicha:

23 iyul (Tokio, Yaponiya):  «Barselona» - «Chelsi»

26 iyul (Kobe, Yaponiya): «Barselona» - «Vissel Kobe»

4 avgust (Barselona, Ispaniya): «Barselona» - «Arsenal»

7 avgust (Mayami, AQSH): «Barselona» - «Napoli»

10 avgust (Enn Erbor, AQSH): «Napoli» - «Barselona»