Ushbu rukndagi navbatdagi ma’lumotlarni yetkazishda davom etamiz.
Fabian Ruisning ishtaxasi karnay
«Napoli» klubining ispaniyalik yarim himoyachisi Fabian Ruis o‘z maoshini 2 barobar oshirishlarini talab etmoqda”, - deb xabar bermoqda «Il Matino» nashri.
Ispaniyalik iqtidor hozirda yiliga 1,5 million yevro maosh olmoqda. U «Real Madrid» klubiga o‘tmaslik evaziga bu summani 3 millionga aylanishini istamoqda. Ana shundagina yosh va iqtidorli futbolchi klubda qolishi mumkin.
Yaqindagina Ispaniya (U 21) jamoasi bilan xalqaro musobaqada g‘olib bo‘lgan futbolchi musobaqaning eng yaxshi futbolchisi bo‘ldi va ko‘plab klublar e’tiborini o‘ziga qaratishga muvaffaq bo‘ldi.
Yakunlangan mavsum davomida 34 ta uchrashuvda maydonga tushgan Fabian Ruiz hisobida 7 gol va 4 ta golli uzatma mavjud.
«PSJ» yangi himoyachi qidirmoqda
Gollandiyalik himoyachi De Ligtning transferi amalga oshmagach, Parij klubi o‘z e’tiborini boshqa himoyachiga qaratishni boshladi.
Unga ko‘ra jamoaning yangi nishoni «Barselona» klubining fransiyalik futbolchisi Samuel Umtit bo‘ladi. Hozirda Katoloniya super klubida asosiy tarkibdagi o‘rnini boy berib qo‘ygan futbolchi APLdan tushgan takliflarni ko‘rib chiqmoqda.
Futbolchining agenti Samuel o‘z Vataniga qaytishni juda istayotganini yashirib o‘tirmayapdi. Kuni kecha boshlangan muzokalar ijobiy amalga oshsa, Umtiti tez orada «PSJ» futbolchisiga aylanadi. Uning transfer qiymati 60 million atrofida baholanmoqda.
Stefan El Shaaravi Ahmedov oldiga yo‘l olmoqda
Italiyaning «Roma» klubi hujumchisi Stefan El Shaaravi deyarli Xitoy klubiga o‘tib bo‘ldi. Futbolchining keyingi jamoasi «Shanxay Shenxua» klubi bo‘ladi.
«Roma» futbolchi ortida 18 million yevro miqdorida pul ishlab oladi. Eng qizig‘I shundaki, futbolchining yillik maoshi 16 millionni tashkil etadi.
Eslatib o‘tamiz, 26 yoshlik futbolchi o‘tgan mavsumda 28 ta uchrashuvda maydonga tushib, 11 ta gol kiritgan edi.
Falkao klubini o‘zgartiradi
«Monako» klubi hujumchisi Rodamel Falkao o‘z klubini o‘zgartirish arafasida turibdi. «L’E Quipe» nashri tarqatgan xabarlarga ko‘ra futbolchining keyingi manzili Turkiyaning «Galatasaroy» klubi bo‘lishi mumkin. Gap shundaki, futbolchining o‘zi yana biroz muddat katta futbol havosidan nafas olish niyyatida. Unga hozirning o‘zida «MLS» klublaridan va Arab jamoalaridan takliflar yetarlicha bo‘lmoqda.
33 yoshlik futbolchining o‘zi esa, yana bir mavsum yuqori formada kuchli chempionatda to‘p sura olishiga ishonmoqda.
Diyego Kosta ortga qaytmoqda
«Atletiko Madrid» klubi hujumchisi Diyego Kosta Angiliyaning «Everton» klubining qizishlari doirasiga tushib qoldi. Gap shundaki, klub egasi sanaladigan eronlik Farad Mosharining futbolchining transferini amalga oshishi uchun istalgan summani berishini ta’kidlab o‘tgan.
Kostaning o‘zi APLga qaytishni sira istamayapti. U faoliyatini aynan «Atletiko Madrid» klubida yakunlashni reja qilmoqda. Bu mavsumda atigi 3 bor raqib darvozasini ishg‘ol qilganiga qaramasdan, unga transfer oynasida qiziqish o‘ganicha yo‘q. «Everton»dan tashqari Kostaga «MLS»dan bir nechta takliflar kelib tushgan. Voqealar rivojini kuzatishda davom etamiz.
«Liverpul» «Tottenhem» bilan jiddiy kurashga kirishdi
Xabaringiz bor, «Tottenhem» klubi «Real Madrid» yarim himoyachisi Daniyel Sebalosning transferini amalga oshirish uchun tinimsiz harakatlar olib bormoqda. Ular futbolchini qo‘lga kiritish maqsadida Eriksonni ham berishga tayyor ekanligini oldingi sonlarimizda aytib o‘tgan edik. Endilikda futbolchi uchun yangi da’vogar paydo bo‘ldi…
«Liverpul» klubi «Shporlar»ning asosiy transfer maqsadini qo‘lga kiritish uchun jiddiy bel bo‘glashgan. Gap shundaki, shaxsan Klopp Sebalosning o‘yinlari bilan qiziqib qoldi va uni o‘z jamoasida ko‘rish niyyatida. Moliyaviy tomondan olib qaralasa, «qizillar»da transferni amalga oshirish imkoni ko‘proq. «Tottenhem» Sebalosni ijaraga olmoqchi edi, «Liverpul» birinchi taklifning o‘zidayoq futbolchiga 45 million yevro taklif qilmoqda. Hozirda «Real Madrid» uchun bu ayni muddao bo‘lishi mumkin. Qisqacha qilib aytsak, «Liverpul» klubi «Tottenhem»ning og‘zidagi oshni ilib ketadigan ko‘rinadi.
