Xabaringiz bor, 7-10 avgust kunlari poytaxtimiz taekvondo bo‘yicha kadetlar o‘rtasidagi jahon chempionatiga mezbonlik qiladi. Ayni paytga kelib, musobaqani o‘tkazish uchun deyarli barcha narsa shay. Musobaqaga mezbonlik qiladigan “Universal” sport saroyi sportchi va mehmonlar uchun ajoyib ko‘rinishga keltirildi.
Janglar boshlanishidan avval sportchilar chigalyozdi mashqlarini olib boradigan maxsus joy ham bugungi kun iqlimidan kelib chiqib, ishtirokchilar uchun qulay tarzda qurib berildi.
Hozirda terma jamoalar O‘zbekiston taekvondo assosiasiyasining sport zallarida so‘nggi tayyorgarlik mashg‘ulotlarini olib borishmoqda. Jahonda o‘z o‘rniga ega bo‘lgan Eron, AQSH, Janubiy Koreya, Braziliya kabi o‘nlab terma jamoalar rejalashtirilgan grafik asosida mashq qilishyapti.
O‘zimizning terma jamoa xususida gapiradigan bo‘lsak, hamyurtlarimiz musobaqada to‘liq tarkib ishtirok etishi belgilab qo‘yilgan. Jahon chempionatida jami 20 nafar sportchimiz (10 nafar yigitlar va qizlar) o‘z vazn toifalarida oltin medal uchun jang qilishadi. Kadetlarimizni aka-uka Sobir va Zaynobiddin Nazaraliyevlar hamda Jasur Boyqo‘ziyev boshchiligidagi tajribali murabbiylar musobaqaga tayyorlashdi.
Bahslar ertada 09:00 dan start oladi. Jahon chempionatining tantanali ochilish marosimi esa ertaga 17:00 da boshlanadi. Shuningdek, mazkur musobaqa doirasida O‘zbekiston taekvondo assosiasiyasi yurtimizda sog‘lom turmush tarzini targ‘ib qilish maqsadida 8 avgustkuni 19:00 da “Xalqlar do‘stligi” maydonida yirik fleshmob tashkil qilishni rejalashtirib qo‘ygan.
Mazkur dunyo birinchiligi xalqaro ekspertlar nigohida bo‘lishi tabiiy. Bugun tunda yurtimizga jahon taekvondo federasiyasi rahbari Chung Van Choy tashrif buyuradi va ertanggi bahslarni bevosita kuzatib boradi.
