Nur-Sultan shahrida start olgan sport kurashlari bo‘yicha jahon chempionatining to‘rtinchi kuni terma jamoamiz uchun muvaffaqiyatli boshlandi. Biroz avval yunon-rim kurashida terma jamoamizning tajribali vakili Rio Olimpiadasi sovrindori Elmurat Tasmuradov (-60 kg) uchinchi o‘rin va Tokio Olimpiadasi yo‘llanmasi uchun kurashda moldovalik Viktor Siobanuga qarshi gilamga chiqdi.
Keskin va murosasiz kechgan bellashuv yurtdoshimizning g‘alabasi bilan yakunlanib, hamyurtimiz kechki dasturda bronza medali uchun kurashish imkoniyati va eng asosiysi Tokio Olimpiadasining yo‘llanmasini qo‘lga kiritdi. Birozdan so‘ng yana bir vakilimiz Jalgasbay Berdimuratov (-77 kg) ham xuddi shu bosqichda litvalik Paulius Galkinas bilan bellashadi.
Eslatib o‘tamiz, bu delegasiyamiz uchun Tokio Olimpiadasiga qo‘lga kiritilgan oltinchi yo‘llanmadir. Ta’kidlash joiz, bu Tasmuradov uchun uchinchi Olimpiada yo‘llanmasidir. Vakilimiz bundan avval London va Rio Olimpiadalarida ham ishtirok etgan.
