Rossiyadagi jahon chempionati yarim finalning kechki dasturdagi janglari boshlandi. 57 kg.da musobaqaga yo‘l olgan Mirazizbek Mirzaxalilov o‘zbekistonlik muxlislarni quvontirdi.

O‘z faoliyatida ilk marta jahon chempionatida qatnashayotgan hamyurtimiz kuchli raqib — mo‘g‘ul sportchisi Erdenebat Senbaatar bilan qizg‘in jang olib bordi. Mo‘g‘ulistonlik bokschi raund boshida Mirzaxalilovni qiyin ahvolga solib qo‘ydi. Vatandoshimiz bo‘lim oxirida o‘ziga kelib olib, vaziyatni o‘nglashga muvaffaq bo‘ldi.

Ikkinchi va uchinchi bo‘limlarda esa Mirazizbek katta ishtiyoq bilan jang qildi va raqibni taslim etishga muvaffaq bo‘ldi. Hakamlarning baholari — 5:0 (29:28, 29:28, 29:28, 29:28, 30:27).

Shu tariqa, o‘zbekistonlik ikkinchi bokschi final yo‘llanmasini qo‘lga kiritdi.