Россиядаги жаҳон чемпионати ярим финалнинг кечки дастурдаги жанглари бошланди. 57 кг.да мусобақага йўл олган Миразизбек Мирзахалилов ўзбекистонлик мухлисларни қувонтирди.

Ўз фаолиятида илк марта жаҳон чемпионатида қатнашаётган ҳамюртимиз кучли рақиб — мўғул спортчиси Эрденебат Ценбаатар билан қизғин жанг олиб борди. Мўғулистонлик боксчи раунд бошида Мирзахалиловни қийин аҳволга солиб қўйди. Ватандошимиз бўлим охирида ўзига келиб олиб, вазиятни ўнглашга муваффақ бўлди.

Иккинчи ва учинчи бўлимларда эса Миразизбек катта иштиёқ билан жанг қилди ва рақибни таслим этишга муваффақ бўлди. Ҳакамларнинг баҳолари — 5:0 (29:28, 29:28, 29:28, 29:28, 30:27).

Шу тариқа, ўзбекистонлик иккинчи боксчи финал йўлланмасини қўлга киритди.