28-31 oktyabr kunlari Osiyo Futbol Konfederasiyasining maxsus ishchi guruhi yurtimizga tashrif buyurdi.

Baholash komissiyasi sifatida kelgan OFKning texnik direktori muovini hamda Yoshlar futbolini rivojlantirish boshqarmasi boshlig‘i Laslo Ssalay, shuningdek, Yoshlar futbolini rivojlantirish boshqarmasi a’zosi Rashid Amir Rashid Said al Badvaviy tashrif doirasida “Bunyodkor” futbol klubi akademiyasi hamda Andijon viloyati bolalar va o‘smirlar futbol akademiyalarini borib ko‘rdi.

Tashrifdan ko‘zlangan asosiy maqsad yurtimizda faoliyat olib borayotgan futbol akademiyalaridagi shart-sharoitlar bilan yaqindan tanishish va “Bunyodkor” futbol klubi akademiyasining “ikki yulduzli” maqom talabalariga javob berishi masalasini ko‘rib chiqishdan iborat edi.

Baholash komissiyasi a’zolari tashrif davomida Andijon viloyati bolalar va o‘smirlar futbol akademiyasi va “Bunyodkor” futbol klubi akademiyasida yosh futbolchilarga yaratilgan shart-sharoitlar, ularning bilim va mahoratlarini oshirishi uchun yaratilgan qulayliklar, akademiya tarbiyalanuvchilarining yashash sharoitlari, ularning futbol bilan shug‘ullanishi uchun yaratilgan sharoitlarni o‘rganishdi.

Qayd etish joiz, baholash komissiyasi a’zolarida yuqoridagi jihatlar ancha iliq taassurot qoldirdi. Endi “Bunyodkor” futbol klubi akademiyasi OFKning “ikki yulduzli” akademiyalari qatoridan o‘rin olishi bo‘yicha yaqin vaqt ichida yakuniy xulosalar qabul qilinadi.

Qayd etish joiz, tajribada futbol akademiyalari uch xil toifaga – “bir yulduzli”, “ikki yulduzli” hamda “uch yulduzli” darajada baholanadi.