Bugungi futbol oqshomidan so‘ng, yilning eng yahshi futbolchilaridan tashkil topgan ramziy terma jamoadan o‘rin olgan Farruh Sayfiyevni suhbatga tortdik.

Bu sovrinni qanchalar kutgan edingiz?

– Avvalo Assalomu Alaykum. Barchani kelayotgan yangi yil bayrami bilan tabriklayman. Sovrinni qo‘lga kiritishimni orzu qilgan edim va bunga erishdim. Avvalo ushbu yutug‘imda jamoadoshlarimning hizmatlari ulkan. Fursatdan foydalanib, jamoadoshlarim va murabbiylarimga o‘z minaddorchiligimni bildirmoqchiman.

«Paxtakor»ning ichki birinchilikdagi muvaffaqiyatli yurishi nima bilan bog‘liq?

Avvalo kuchli va shakillangan jamoa bo‘lganimiz uchun barcha kuboklarni yutib oldik deb hisoblayman. Shuningdek, bu mavsumda omad ham to‘liq biz tomonimizda bo‘ldi.

Nima deb o‘ylaysiz, «Paxtakor» shu ko‘rinishida ham OCHL bahslarida g‘oliblikka da’vogarlik qilishi mumkinmi?

- O‘tgan mavsumdagi o‘yinlarimizga e’tibor beringda, biz Eron chempioni bilan mehmonda durang o‘ynadik va Toshkentda g‘alaba qozondik. Saudiya klubini ham Toshkentda mag‘lub qildik. Xavining jamoasi bilan qanday o‘yin ko‘rsatganimizni barcha ko‘rdi. Mehmondagi ikkita uchrashuvda so‘nggi daqiqalarda o‘tkazib yuborilgan gollar evazigagina guruhda qolib ketdik. Bizga konsentrasiya yetishmadi. Bu mavsumda o‘tgan safargi xatolarga yo‘l qo‘ymasak, guruhdan chiqishimiz uchun imkon bor.

Jamoa ichki birinchilikda trebl qayd etgach, xalqaro uchrashuvlarda yahshiroq natija ko‘rsatishga majbur. Bu fikrimga qo‘shilasizmi?

- Qaysidir ma’noda qo‘shilaman. Endilikda yurtimiz sharafini munosib himoya qilish vazifasi zimmamizda turibdi. Shunday bo‘lsada, treblning o‘ziga hos plyus tomonlari ham mavjud. Bu jamoamiz futbolchilarining o‘z kuchiga bo‘lgan ishonchining yanada oshishiga hizmat qiladi. Shunday ekan, kelasi mavsum OCHL bahslarida yurtimiz sharafini munosib himoya qilishga harakat qilamiz.