O‘zbekiston olimpiya terma jamoasi yana ikki haftadan keyin boshlanadigan Osiyo chempionatida o‘z ishtirokini boshlaydi. Lyubinko Drulovich shogirdlari guruh bosqichida Eron, Janubiy Koreya va Xitoy bilan bir guruhdan joy olishgan. Olimpiyachilarimiz 9 yanvar kuni Eronga qarshi bahs bilan musobaqani boshlashadi.

Eron olimpiya terma jamoasi yarim himoyachisi Umid Nurafkan www.persianfootball.com saytiga bergan intervyusida O‘zbekistonga qarshi o‘yin borasida o‘z fikrlari bilan o‘rtoqlashdi.

"Maqsadimiz — Olimpiya o‘yinlari yo‘llanmasini qo‘lga kiritish. Bu maqsadga erishish uchun avvalo dastlabki o‘yin haqida o‘ylashimiz kerak. Musobaqaning birinchi bahsida O‘zbekistonga qarshi maydonga chiqamiz.

Musobaqada dastlabki o‘yin hamisha muhim hisoblanadi. Buni jamoadoshlarimga ham aytdim. Bu o‘yinni intizorlik bilan kutyapmiz. Biz o‘z oldimizga ulkan maqsadlar qo‘ygan jamoamiz. Qahramon bo‘lish uchun qo‘limizdan kelgan barcha ishni qilamiz.

O‘zbekiston, Janubiy Koreya va Xitoy — yaxshi jamoalar. O‘zbekiston qarshi hujumda juda kuchli va bu jamoa safida kuchli hujumchilar bor. Shuningdek, Koreya va Xitoy tezkor futbol namoyish qilishini kutyapmiz. Shu bilan birga, ular ham Eron haqida yaxshi ma’lumotga ega", — dedi Nurafkan.