"Boxing Day"ning qaynoq og‘ushiga kirib boryapmiz. Bugun bizda “Vest Xem” “Lester”ni qabul qiladigan o‘yin (22:30) va tungi “Byornli” - "MYU" bahsi.

Dastlabki uchrashuvni hamkasbim Diyor Imomxo‘jayev sharhlab borsa, "Yunayted" ishtirokidagi uchrashuv mening chekimga tushgan. Xo‘sh, o‘yin haqida nima desam ekan?!

Kecha matbuot anjumanida Sulsher shunday degan: “Men yigitlarga bugungi holatimiz haqida tushuntirdim. Ular darajamizni yaxshi bilishadi va yaxshi formada ekanligimizda bizdan nima kutish mumkinligini ham anglab yetishgan. Biz bugun "Man. Siti" kabi o‘ynay olmaymiz. Faqat "Siti"ning o‘zigina bunday o‘yinga qodir...”

Ole-Gunnar bu gaplarini "Vulverxempton"dagi uchrashuv boshlanmasidan aytgan. Ya’nikim, "Siti"ni e’tirof etgan. Ammo kechagi dramatik o‘yindan so‘ng ham norvegiyalikning gapi o‘zgarmaydi: “MYU" "Siti" kabi o‘ynamasligi kerak — g‘alaba qozonishi shart!”

"Nyukasl" “qizil iblislar”ga ko‘p xatolar sovg‘a qildi. Lekin uyida hamisha zo‘r o‘ynagich "Byornli"dan shunday sovg‘alar kutish to‘g‘rimi? Yo‘q, albatta.

Kris Vud va Eshli Barns markaziy himoyachilarni qiynashi shubhasiz. Skot Maktominey o‘ynamaydi, Pogba va Fred bu bo‘shliqni yopa olisharmikan? Ajoyib formadagi Reshford hamda Grinvud goleadorlik hislatlarini namoyon etishadimi?
 
Xullas, savollar ko‘p, javoblarni esa tunda olamiz.
 
Kuzatamiz.

Xayrulla HAMIDOV.