Kubok o‘yinlari hamisha bosqichma-bosqich kuchayib boraveradi. Guruh bahslarining ilk o‘yinida yutqazib qo‘ygan terma jamoa keyingilariga yaxshilab tayyorlanadi va ikkitasini yengsa, pley-offga yo‘l oladi. Chorak final ko‘pincha yarim finaldan yengilroq kechadi. Yarim final oxirgi o‘yindan...

Drulovich boshchiligidagi yigitlarimizga shunday taqvim ulashildiki, hammasi teskari ketadi. Birinchi o‘yinimiz – final! Xalqiga sport orqali umid uyg‘otishni istayotgan Eron ikki karra kuchli bo‘lib o‘ynashi turgan gap.

Keyin bizni yarim final darajasidagi o‘yin kutib turibdi – birinchi turda Janubiy Koreya bilan qirpichoq bo‘lgan Xitoy.

Uchinchi turimiz chorak final maqomida – Janubiy Koreya terma jamoasi bilan odatda shunaqa bosqichlarda o‘ynashga odatlanganmizku...

Pley-offga shu guruhdan chiqa olsak, pley-offning uchta o‘yini guruh o‘yinlari kabi oson kechadi. Chunki aniqki, chorak finalda Koreyadan kuchli jamoaga yo‘liqmaymiz, yarim finalda Xitoy darajasidagi jamoaga to‘qnash kelamiz. Xudo xohlab finalga chiqsak, u yerda kim bo‘lishidan qat’i nazar guruhning ilk o‘yini kabi og‘riqsiz o‘tadi. Chunki yutqazib qo‘yish ham fojea emas – Olimpiada yo‘llanmasi qo‘lda naqd bo‘ladi!

Xullas, shunaqa teskari taqvim bilan boshlanadigan Osiyo chempionatiga xush keldik. Yigitlar, bugungi finalda omad! Yarim final va chorak finalni ham xotirjam o‘tkazib olsangiz, qarab turibsizki, uchta o‘yindan iborat guruh o‘yinlarida bemalol harakat qilasiz. Biz ishonamiz sizga, oltita o‘yin ko‘rib qaytamiz. Uchinchi o‘rin uchun kechadigan uchrashuvni gapirmayapmiz, yurak ko‘tarmaydi.

Qorli kechani eslang, azizlarim!!!

Xayrulla Hamidov.