Eron Olimpiya terma jamoasiga qarshi o‘yindan so‘ng jamoamiz sardori Islom Qobilov uchrashuv taassurotlari haqida o‘z fikrlari bilan o‘rtoqlashdi.

“Har bir bahsda dastlabki daqiqalar raqibni o‘rganish va o‘yinga kirishib olishga sarflanadi. 15-20 daqiqadan keyin o‘z o‘yinimizni ko‘rsata boshladik va taym oxirida gol urishga ham muvaffaq bo‘ldik.

Ikkinchi bo‘lim boshida biroz xotirjamlikka berilishimiz oqibatida darvozamizdan to‘p o‘tkazib yubordik. Nima bo‘lganda ham Eron Osiyoda har qaysi yosh toifasida kuchli hisoblanadi. Har ikki jamoaning ham kuchli va zaif tomonlari bo‘ladi. Xatolarimizni endi videoda ko‘rib, tahlil qilib chiqamiz.

O‘tgan safar Osiyo chempionatini mag‘lubiyat bilan boshlab, yakunda chempion bo‘lib kelgan edik. Bu o‘yin yutqazmadik. Umumiy hisobda yomon o‘yin ko‘rsatmadik deb o‘ylayman. Bugungi o‘yin biz uchun saboq bo‘ldi. Keyingi uchrashuvlarda faqat g‘alaba uchun maydonga tushib, guruh bosqichidan chiqishga bor imkoniyatimizni ishga solamiz”, – dedi Islom Qobilov.