Janubiy Koreyaning “Interfootball” nashrida "Self-Night" yoxud Kim Hek Boum O‘zbekistonni "qirg‘iyning ko‘zi" bilan kuzatdi”, nomli maqola chop etildi.

Ma’lumki, Kim Xek Boum boshchiligidagi Janubiy Koreyaning U23 terma jamoasi 12 yanvar kuni Tailandning Songxla shahridagi “Tinsulanon” stadionida Eronni 2:1 hisobida mag‘lub etdi. Ushbu uchrashuvdan so‘ng bosh murabbiy O‘zbekiston – Xitoy o‘yinini kuzatish uchun to‘g‘ri stadionga yo‘l olgan. O‘tgan turda ham Xitoy U23 termasi ustidan g‘alaba qozongan koreyslar “C” guruhidan birinchi bo‘lib 6 ochko bilan chorak finalga yo‘l olishdi. Maqolada, Eron bilan o‘yinda Xitoy termasiga qarshi o‘ynagan boshlang‘ich tarkibdagi 7 o‘yinchining almashtirilganligi ishonchli g‘alabaning asosiy omili sifatida ta’kidlangan. Demak, “qirg‘iy ko‘z” bosh murabbiy to‘g‘ri va aniq taktikaga tayanib, aql bilan ish ko‘rgan.

O‘zbekiston-Xitoy uchrashuvini bevosita maydondan kuzatgan bosh murabbiyning 9 ochko bilan chorak finalga birinchi o‘rinda chiqish niyati borligi ma’lum qilindi.

“Biz keyingi bosqichni hal qildik, ammo 1-o‘rinni emas! Bu o‘zbeklar bilan bahsda ma’lum bo‘ladi. Men futbolchilarimga ishonaman, – deya intervyu bergan Kim Xek Boum.

“Janubiy Koreya U20 terma jamoasi bosh murabbiyi bilan birgalikda ikkala taymni ham kuzatgan Kim Xek Boum terma jamoamiz a’zolarining har bir harakatini tahlil qilgan. Yakunda o‘yinni tasvirga olib bergan koreys jurnalistlariga minnatdorlik bildirgan. Demak, Janubiy Koreya O‘zbekiston bilan o‘yinga o‘ta jiddiy qaramoqda va biroz cho‘chiyotganligi ham ma’lum. Biz esa, ushbu turnirda “och bo‘rilar”ning har qanday ko‘zli raqiblarini ayovsiz “g‘ajib tashlashlarini” tilab qolamiz.

Rahmiddin Shermatov
Janubiy Koreya, Tegu shahri.
2020 yil 13 yanvar.