Yangi mavsumga tayyorgarlik ko‘rayotgan AGMK jamoasining nazorat bellashuvidagi navbatdagi raqibi — “Surxon” klubi bo‘ldi.
Qiziqarli va keskin kurashlarga boy kechgan bahsda olmaliqliklar g‘alabani tantana qildi.
Har ikkala bo‘limda murabbiylar shtabi deyarli barcha futbolchilarga imkoniyat berishdi. Dastlab uchrashuvning 3-daqiqasida mehmonlarning qanotdan uyushtirgan hujumini Husniddin G‘ofurov golga aylantirib, “Surxon”ni hisobda oldinga olib chiqdi - 0:1. Biroq uchrashuvning ilk daqiqalaridanoq o‘yinda o‘z ustunligini ta’minlagan olmaliqliklar tezkor javob qaytardi. Abdulovning uzatmasidan so‘ng ustamonlik raqibdan qochgan Sanjar Tursunov darvozabonni dog‘da qoldirib, bahsda hisobni tenglashtirdi - 1:1.
Shundan keyin ham qator hujumlar uyushtirgan AGMKGning 27-daqiqadagi urinishini Saydullo Rahmatov o‘zining aniq zarbasi bilan golga aylantirdi - 2:1.
Tanaffusga jamoalar aynan shunday ko‘rinishdagi hisob bilan yo‘l olishdi.
Ikkinchi taymda tarkibni butkul yangilagan AGMK 53-daqiqada yana gol urishga muvaffaq bo‘ldi. Bu gal Arslonmirat Amanov Nurmatovdan uzatmani qabul qilib, uzoqdan darvozani aniq nishonga oldi va uchrashuvda yakuniy hisobni o‘rnatdi - 3:1!
Shu tariqa AGMK ikkinchi nazorat bellashuvida ham g‘alaba qozondi va tayyorgarlik bosqichining ikkinchi qismini yakunladi. Tayyorgarlik doirasidagi uchinchi bosqich yig‘inni AGMK Birlashgan Arab Amirliklarida olib boradi. Bu haqda keyinroq batafsil ma’lumot beramiz.
Nazorat uchrashuvi
25 yanvar, shanba.
AGMK — «Surxon» 3:1
Qibray stadioni.
Hakam: Viktor Serazitdinov.
Gollar: Sanjar Tursunov (17 assist: Abdulov), Saydullo Rahmatov (27), Arslonmirat Amanov (53 assist: Nurmatov) - Husniddin G‘ofurov (3)
AGMK (birinchi bo‘lim) — Roman Abdulov (Suhrob Sultonov, 30 - Akmal Shorahmedov, Igor Zonich, Sardor Rahmonov, Saydullo Rahmatov - Yovan Jokich, Mirjamol Qosimov, Murod Toshmatov - Sanjar Tursunov, Mate Vatsadze, Elguja Grigalashvili.
Ikkinchi taymda maydonga tushgan tarkib — Suhrob Sultonov (Valijon Raximov, 60) - Mirg‘iyoz Sulaymonov, Dilshod Jo‘rayev, Bobur Yo‘ldoshev, Sheroz Jalolov - Erkin Baydullayev, Jasur Umarov, Xojimat Erkinov - Arslonmirat Amanov, Shahzod Nurmatov, Farhod Imamov.
