Italiya nashrlari “Milan” va “Arsenal”ni qiyoslashibdi. 2020 yil boshlangandan buyon bu ikki klub yutqazmadi. Uh, sensasiya-ku, dersiz, ha, ular rostanam muxlislarini sal bo‘lsa ham xursand qilishmoqda. Biroq, bu natijalarning bir jiddiy tafovuti bor.

Hozir ayni daqiqalarda “Milan”ning o‘yinini kutib o‘tiribman. 2020 yilni mag‘lubiyatsiz o‘tkazayotgan klub. Ha, bu yerda yuz foiz Zlatan effekti. Pioli murabbiydir, ammo Ibrohimovich qarshisida milanlik futbolchilar chindan-da futbol o‘rgatadigan pedagogni ko‘rgandek bo‘lishdi. Chalhano‘g‘li tan oldi misol uchun: “Zlatan o‘ynayotgan payti noaniq uzatma berishga qo‘rqyapman”.

“Milan” statistikasiga qarasak, klub tablodagi hisobdan boshqa masalada o‘tgan yilgidan zo‘r o‘ynayotgani yo‘q. O‘sha-o‘sha vaziyatlar, darvozasi oldida hamon raqibga berilayotgan imkoniyatlar. Nima o‘zgardi? Sulsher "MYU"ga kelgandagi motivasiya paydo ulashilgan, xolos. “Milan” rahbariyati bu yutuqlar aslida oniy ekanligini bizdan-da yaxshiroq tushunib turishibdi va baribir yangi murabbiy olib kelamiz, deyishmoqda. Keyingi mavsumga, albatta.

Tarixan va inqirozan “Milan”ga o‘xshash “Arsenal” ham 2020 yili yutqazmadi. Jamoada xarakter paydo bo‘lgani yaqqol sezildi. O‘yin uslubida o‘zgarishlar ko‘rilyapti. Rang-baranglik oshdi. Bu Artetaga bog‘liq o‘zgarish.

Zlatan – futbolchi va yigitlarni o‘zi maydonda o‘ynayotgan paytigina ruhlantira oladi. Taktikani belgilashda, yangi qarashlarni ulashishda futbolchi hech kim emas. Zlatandan kattaroqlari ham. Demak, “Arsenal”dagi o‘zgarishlar garchi natija e’tibori bilan “Milan”ga o‘xshash bo‘lsa-da, botinan boshqacharoq. Murabbiy o‘zgartirayotgan jamoa bilan yetakchi futbolchi o‘zgartirayotgan klub o‘rtasida katta farq bor. Qay birining kelajagiga umid bilan qarash mumkin? Albatta, murabbiyi salohiyatli jamoanikiga.