Futbol tv kanaliga o‘tganimdan buyon to‘rtta derbini sharhladim.
Uchtasi poytaxt jamoalari o‘rtasidagi bahs:
“Chelsi” – “Arsenal”
“Lasio” – “Roma”
“Real” – “Atletiko”
Biri Turin derbisi:
"Torino" - "Yuventus"
Muhimi, bachasi shiddatli kechgan. Turin derbisida asabiylik,
London derbisida drama guvohi bo‘lgan ersak, Rim derbisida o‘ta keskin to‘qnashuv, Madrid derbisida taktik yurishlar...
2 ta o‘yinda durang, ikkisida kichik hisobli farq. Bilib olavering, naqadar teng kurashlar taklif etilgan.
Bugun navbat Milan derbisiga yetib keldi. Bu shahar Italiya poytaxti bo‘lmasa-da, go‘zallik poytaxti...
“San Siro” tasvirini Mikelanjelo chizib berar, biz ojizmiz.
Hozirda “Inter” va “Milan” turli holatda. Biri chempionlik uchun kurashayotgan bo‘lsa, ikkinchisi yevrokuboklarga yo‘l olsa ham katta gap.
2020 yilning o‘zini oladigan bo‘lsak, Zlatani bilan “Milan” 7 o‘yindan 5tasida yengdi. Shved o‘ynamagan bahslarda durang.
Milan derbisida uning asosiy tarkibda bo‘lishini bilmaymiz. Oxirgi daqiqalarda hal etiladi.
Shuningdek, Lautaro va Shkrinyarsiz qolgan “neradzurri” o‘yin boshidanoq ikkinchi posboni bilan o‘ynashi mumkin. Samir Handanovich barmog‘idan jarohat olgan.
Sensi va Eriksen – ikkisi birdaniga tushirilmasa kerak, ularning bog‘lami hali to‘liq ishlanganiga shubhalanishmoqda.
Xullas, muammolar turfaligidan tomonlar o‘rtasida tenglik bordek. Aynan shunisi kerak bizga!
“Milan” ijobiy natija qayd etsa, muxlislari mavsumdan rozi bo‘lishadigandek. “Inter” uchun bahs o‘z-o‘zidan “hayot-mamot” turkumidan...
Anonsimning oxirida Andrey Shevchenko gapini keltirib o‘taman:
“Milan derbisi hamisha og‘ir bo‘ladi. Ikki tomon uchun ham. Lekin muxlislar uchun u hech qachon zerikarli bo‘lmaydi. “San Siro”da ikki Milan klubi o‘ynayotgan payti hayot to‘xtab qoladi. Hammasi shu mo‘’jaz o‘yingohga ko‘chadi. Endi ishtirokchilarning holatini tasavvur qilib olavering. Bu og‘ir. Hatto eslagani ham qo‘rqyapman!”
225-derbida ham eslab yuradigan o‘yin kutib qolamiz yigitlardan. Eng muhimi kecha Veronada o‘sha sensasiya sodir bo‘ldi. Konte shogirdlari yengishsa, yana birinchi o‘ringa qaytishadi.
Soat 00:45da Futbol tv kanalida! Birga kuzatamiz...
