«Atletiko» bosh murabbiyi Diyego Simeone Yevropa chempionlar ligasi nimchorak final bosqichi doirasida «Liverpul»ga qarshi bo‘lib o‘tgan dastlabki o‘yin borasida o‘z fikrlari bilan o‘rtoqlashdi.

«Shunday o‘yinni kutgandik. Juda kuchli raqib, jismoniy jihatdan kuchli jamoa. Har ikkala darvoza oldida vaziyatlar yuzaga keldi, ammo biz o‘yin boshida imkoniyatdan foydalanib qoldik. Shundan so‘ng hisobni ushlash uchun kerakli futbol namoyish qildik. Qarshi hujumlarda gol urish uchun yana imkoniyatlarga ega bo‘ldik.

Agar hujumchilar himoyaviy harakatlarda ishtirok etishmasa, jamoa bunday natijaga erishmagan bo‘lardi. Barcha yaxshi harakat qildi. Ajoyib jamoaga qarshi og‘ir va murakkab o‘yin bo‘ldi.

«Liverpul» juda yaxshi o‘ynadi, ular to‘pni olib qo‘yishda haqiqiy mutaxassis. Ammo bizda yana gol urish uchun vaziyatlar bo‘ldi.

O‘yindagi muhit aqlbovar qilmas darajada bo‘ldi. Sakkiz yillik faoliyatim davomida bunday atmosferani ko‘rmaganman.

Javob o‘yini? Barchasi boshqatdan boshlanadi. Boisi, raqib o‘z uyida ajoyib o‘yin o‘tkazishga o‘rgangan», – dedi Simeone.