O‘zbekiston futbol assosiasiyasi Etika qo‘mitasining yig‘ilishi o‘tkazildi. Unda Coca Cola Superliga 1-tur uchrashuvlaridan so‘ng “Buxoro” futbol klubi bosh murabbiyi Muxsin Muhammadiyev hamda “Navbahor” futbol klubi o‘yinchisi Ivan Solovyovga nisbatan intizom chorasini qo‘llash masalalari ko‘rib chiqildi.

Xususan, Coca Cola Superliga 1-turi doirasidagi “Qo‘qon-1912” – “Buxoro” uchrashuvidan so‘ng o‘tkazilgan matbuot anjumani vaqtida “Buxoro” futbol klubi bosh murabbiyi Muxsin Muhammadiyev uchrashuv hakamlarining o‘yin davomida qabul qilgan qarorlarini haqorat qilib, bu bilan O‘zbekiston professional futbol klublari uchun 2020 yilgi musobaqalarni o‘tkazish Reglamentida belgilangan uchrashuv rasmiy shaxslariga nisbatan protest va shikoyat bildirish tartibiga rioya qilmagani uchun unga nisbatan Intizom kodeksining 2-bo‘lim 5.39-bandiga muvofiq moddiy jarima belgilandi.

Shuningdek, Coca Cola Superliga 1-turi doirasidagi “Paxtakor” – “Navbahor” uchrashuvidan so‘ng “Navbahor” futbol klubi o‘yinchisi Ivan Solovyov ijtimoiy tarmoqlarda uchrashuv bosh hakami sha’niga nisbatan haqoratli so‘zlar ishlatgani uchun unga Intizom kodeksining 2-bo‘lim 5.38-bandiga muvofiq moddiy jarima belgilandi.