Stadion.uz futbol olamidagi koronavirus bilan bog‘liq yangiliklar bilan tanishtirishda davom etadi.
Massola faol bo‘lishga chaqirmoqda
Italiyaning «Inter» jamoasining afsonaviy futbolchisi Sandro Massola barcha futbolchilarni ushbu virusga qarshi kurashishga chaqirmoqda. Sobiq futbolchining aytishicha, barcha futbolchilari ushbu virusga qarshi kurash uchun o‘z mablag‘lari bilan yordam berishlari kerak.
“A seriya futbolchilari har oyda millionlab yevro daromad olishmoqda. Agar shu pullarning hech bo‘lmasa 3 foizini virusga qarshi kurashga sarflashsa, bu katta naf berishi mumkin. Ayni damda ular o‘z maoshlarining hech bo‘lmasa yarmidan voz kechishlari kerak. Shu yo‘sinda o‘z klublari ko‘rayotgan zararlarning bir qismini ko‘tarishgan bo‘ladi”, — deydi sobiq futbolchi “Tuttosport” nashri uchun bergan intervyusida.
RFS yangi qaror qabul qildi
Rossiya futbol rahbarlari endilikda barcha majlislarni videoefirda olib boradigan bo‘ldi. Bu haqida “Baza” nashri ma’lum qilgan. Manba bergan xabarlarga qaraganda, barcha majlis va uchrashuvlar endilikda “skayp” ilovasida amalga oshiriladi.
Eslatib o‘tamiz, avvalroq RFSda faoliyat olib borayotgan David Bergovning koronavirus bilan og‘rigani haqidagi xabar bilan tanishtirgan edik.
APLdan yangi qaror
“The Times” nashri bergan xabarlarga qaraganda, APLning qolgan uchrashuvlariga yoshi yetmishdan o‘tgan muxlislar kiritilmasligi mumkin. Bunga qariyalarning koronavirus yuqtirib olishining xavfi kattaligi sabab bo‘lmoqda.
Eng qizig‘i shundaki, agar bu qaror qabul qilinsa, “Kristal Pelas” murabbiyi – Roy Xojson (uning yoshi 72 da) o‘z ishidan ozod etilishi mumkin.
Hakamlar
UEFA barcha italiyalik hakamlarni Yevropa ligasi va Yevropa chempionlar ligasi musobaqalarida ishlashlarini ma’n etdi. Shu yo‘sinda UEFA virusning Yevropaga tarqalish ehtimolini kamaytirishga qaror qilgan. Bu qarorga Italiya futbol federasiyasi hech qanday e’tiroz bildirgani yo‘q.
Eslatib o‘tamiz, ayni damda Italiya Xitoydan keyingi o‘rinda koranavirus o‘chog‘iga aylanib bormoqda.
RPLdan yangi qaror
RPL rahbarlari ham futbol uchrashuvlari boshidagi “qo‘l bilan so‘rashish”ni ma’n etishi mumkin. Bu haqida RPLning rasmiy sayti ma’lum qilgan.
Qayd etib o‘tish joiz, avvalroq APL shu uslubni tadbiq qilgan edi. Endilikda Yevropaning bir yo‘la 10 ta chempionatida shu uslubdan foydalanilmoqda. RPL ham tez orada keskin qarorlar qabul qilishi mumkin.
