Yevropa futbol assosiasiyalari ittifoqi (UYEFA) 2021 yilga ko‘chirilgan Yevropa chempionati mezbon-shaharlar sonini kamaytirishni ko‘rib chiqmoqda. Bu haqda "Daily Mail" xabar tarqatdi.

Rejaga ko‘ra, musobaqa Yevropaning 12ta shahrida o‘tkazilishi kerak edi. Ammo koronavirus pandemiyasi tufayli zarar ko‘rgan Rim va Bilbao shaharlari musobaqani o‘tkazishga tayyor bo‘lmasligi mumkin.

Bundan tashqari, 2021 yilning yozida ba’zi stadionlarda turli tadbirlar rejalashtirilgan. Bu esa Yevropa chempionati o‘yinlarini o‘tkazishda muammolarni keltirib chiqaradi.

Aslida Yevro-2020ni butun qit’a bo‘ylab o‘tkazish g‘oyasi UYEFAning avvalgi rahbari Mishel Platiniga tegishli bo‘lib, tashkilotning hozirgi prezidenti Aleksander Cheferinga ushbu reja ma’qul kelmagan. Ma’lumotlarga qaraganda, UYEFA hozirda barcha 12ta mezbon shahar bilan aloqani ushlab turibdi. Tashkilot musobaqani o‘tkazish bilan bog‘liq ayrim o‘zgarishlarga qo‘l urishi mumkin. Boz ustiga, musobaqaning rasmiy taqvimi hali e’lon qilinmagan.

Yevropa chempionati Yevropaning 12ta shahrida o‘tkazilishi kerak: Sankt-Peterburg, London, Myunxen, Boku, Rim, Buxarest, Dublin, Kopengagen, Bilbao, Glazgo, Budapesht va Amsterdam.