Xabaringiz bor, ayni vaqtda koronavirus pandemiyasi sabab deyarli butun dunyoda futbol uchrashuvlari vaqtincha to‘xtatilgan. Shu jumladan, mamlakatimizda ham futbol mavsumi karantin sabab vaqtincha tanaffusga chiqqan.

Lekin bu futbolchilar kundalik mashg‘ulotlarni to‘xtatganini anglatmaydi. Turli yoshdagi terma jamoalarimizga nomzod futbolchilarning barchasi karantin qoidalariga to‘liq rioya qilgan holda uy sharoitida mashg‘ulotlar o‘tkazib borishmoqda.

Ushbu jarayonni O‘zbekiston futbol assosiasiyasi terma jamoalar bo‘limi vakillari, shuningdek terma jamoalarimiz murabbiylar shtabi muntazam nazorat qilib bormoqda.

O‘tgan hafta O‘FA Birinchi vise-prezidenti Ravshan Ermatov barcha yoshdagi terma jamoalarimiz bosh murabbiylari bilan videomuloqot o‘tkazib, unda koronavirus sabab yuzaga kelgan ayni tanaffus, uning terma jamoalar taqvim rejasiga ko‘rsatadigan ta’siri, qolaversa ushbu vaqt oralig‘ida terma jamoalarga nomzod futbolchilarning sport formasini barqaror tarzda ushlash borasida amalga oshirilayotgan ishlar kabi masalalar batafsil muhokama etilgan edi.

Bugun O‘FA rahbariyati, terma jamoalar bo‘limi vakillari, U-16 hamda U-19 terma jamoalarimiz ustozlari ushbu yoshdagi terma jamoa a’zolari bilan videomuloqot orqali bog‘lanib, ularning uy sharoitidagi mashg‘ulot jarayonini bevosita kuzatib borishdi. Iliq ruhda o‘tgan muloqot jarayonida futbolchilar murabbiylar shtabi tomonidan ishlab chiqilgan uyda bajarish lozim bo‘lgan mashg‘ulotlar majmuasini muntazam bajarib borishayotganini, bu orqali sport formasini imkon darajasida yaxshi ushlashga intilishayotganini, qolaversa karantin davrida uyda vaqtni mazmunli o‘tkazishga harakat qilishayotgani ta’kidlab o‘tishdi.