Nigeriyalik futbolchilar O‘zbekistonda oydan-oyga ko‘payib borayotgani sir emas.

Muborakning "Mash’al" klubida to‘p surayotgan nigeriyalik Ifeani Ifeani mashhur ESPN nashri bilan suhbatlashdi Bunda futbolchi O‘zbekiston chempionati haqida iliq fikrlar bildirgan. Jumladan, klublarning har kun uchun alohida belgilangan programmasi bor ekaniga, har bir pozisiya futbolchilari uchun alohida mashg‘ulotlarga, trenajerga e’tibor qaratilishiga urg‘u bergan. Nigeriyada esa bunday sharoitlar yo‘q.

Yaxshi bilasizki, so‘nggi ikki mavsumda Superliga klublari o‘zining uy uchrashuvlarini o‘tkazadigan stadionlar, ulardagi maydon maysasi sezilarli yaxshilandi. Ifeani Ifeani bu narsani ham e’tibordan chetda qoldirmagan, o‘yinlar tabiiy maydonlarda o‘tishini alohida e’tirof etgan.

Albatta O‘zbekiston darajasini Nigeriyaniki bilan solishtirish biz uchun g‘alati ko‘rinishi mumkin. Biroq bizdan farqli ravishda, nigeriyalik futbolchilarining obro‘si, Nigeriya termalarining jahonda tutgan o‘rni ancha baland. Nima demoqchiman, bizda ishni to‘g‘ri yo‘lga qo‘yish, o‘z dunyoqarashimizni biroz o‘zgartirish masalalarigina dolzarb. Qolgan sohalarda sharoitlarimiz noliydigan emas.

Ma’lumot uchun, Ifeani Ifeani Nigeriya milliy terma jamoasi a’zolaridan biri hisoblanadi. Uning "Mash’al" bilan 2 yillik shartnomasi mavjud. Karantin davrida u Muborakdagi klub bazasida istiqomat qilyapti. Ifeaniga Polsha quyi ligasidan moliyaviy tomondan olib qaraganda "Mash’al"dan ikki marta yaxshiroq taklif bilan chiqqan bo‘lsa-da, u milliy terma jamoa bosh murabbiyining tavsiyasidan kelib chiqib, Polsha quyi ligasidan ko‘ra O‘zbekiston oliy divizionini afzal bilgan. Ya’ni, ba’zi vatanparvar braziliyalik futbolchilar singari, milliy termadan joy olish yo‘lida ozroq puldan voz kechishdan ham qaytmagan.

Diyor Imomxo‘jayev