Angliyaning «Everton» klubi hujumchisi Moyze Kin karantin vaqtida qizlar bilan o‘z uyida diskoteka uyushtirdi.

The Sun nashrining tarqatgan ma’lumotiga qaraganda, 20 yoshli hujumchi o‘zining Cheshirdagi uyiga do‘stlari va qizlarni taklif qilgan. O‘sha kechadagi rasmlar Snapchat guruhi orqali «Karantindan tozalanish» sarlavhasi ostida internetda tarqaldi.

«Yovvoyi tusda bo‘lib o‘tgan kecha ertalabgacha davom etdi. APL yulduzi bo‘lgan bu futbolchi ishlamayotgan bo‘lsada, maosh olmoqda. Bu voqea ishidan ayrilgan yoki maoshi qisqartirilgan odamlarni xafa qilishi aniq. Ular o‘zlarini qonundan yuqori deb hisoblaydilar», – dedi manba.

«Everton» klubi o‘z hujumchisining hatti-harakatlarini keskin qoraladi. «Klub har doim hukumatning barcha tavsiyalariga, shu jumladan uyda va ko‘chada o‘zini tutish qoidalariga rioya qilish muhimligini ta’kidlaydi. Biz barcha xodim va futbolchilarga rasmiy xabarlarni yuboramiz», – deyiladi klub bayonotida.