SSSR va O‘zbekiston chempionatlarida “Paxtakor” posbonlari ko‘p marta raqibning penaltidan tepgan to‘pini qaytarishgan.

Eng ko‘p penalti mos ravishda jamoamiz tarkibida eng ko‘p o‘yin o‘tkazgan darvozabon Aleksandr Yanovskiy darvozasi tomon tepilgan. 54 bor raqiblar 11 metrlik nuqtadan zarba yo‘llashgan. Yanovskiy ularning 11tasini qaytara olgan. Pavel Bugalo esa 24 penaltidan 8tasining gol bo‘lmasligiga erisha olgan.

Darvozasi sari 5tadan ortiq penalti belgilangan posbonlar orasida zarbani qaytarish bo‘yicha eng yaxshi ko‘rsatkichlar Anvar Jabborov va Sergey Pokatilovga tegishli. Jabborovga tepilgan 6 zarbadan uchtasi raqiblar uchun omadsiz tugagan, 50 foiz zarba bartaraf qilingan. Pokatilov esa 11 zarbadan 5tasini qaytargan. O‘rtacha 45 foiz holatda Pokatilov gol bo‘lishiga yo‘l qo‘ymagan.

SSSR chempionatlarida 130 zarbadan 29tasini darvozabonlarimiz bartaraf etgan bo‘lsalar (22 foiz), O‘zbekiston chempionatida bu ko‘rsatkich 81tadan 28tani tashkil qiladi (35%). Jami 211 penaltining 57tasida posbonlarimiz o‘ziga xos duelda g‘olib chiqishgan. Bu esa 27 foiz penalti golga aylanmaganini bildiradi. O‘rtacha 11 metrlik zarbasining har to‘rtinchisida darvozabonlarimiz mahorat ko‘rsatishgan.