O‘zbekiston Superligasi 5-tur doirasidagi "Qo‘qon-1912" - "Qizilqum" uchrashuvidan keyingi matbuot anjumanining ikkinchi qismida mehmonlar ustozi Tachmurod Agamurodov qatnashdi.

"Shogirdlarim bir yarim taym yaxshi o‘ynashdi. Afsuski, birinchi goldan keyin hammasi o‘zgarib ketdi. Zaxiradan maydonga tushgan futbolchilar o‘yinni kuchaytirishlari kerak edi. Ammo unday bo‘lmadi. Uch daqiqada uch gol o‘tkazib yuborishni tushunish qiyin. Jamoani bunga haqqi yo‘q edi. 1:0 hisobida mag‘lubiyatga uchrayotganingda hisobni tenglashtirish uchun imkoniyat bo‘ladi, biz esa aksincha 3 ta gol o‘tkazib yubordik. Bugun har tomonlama raqibga yutqazib qo‘ydik. “Qo‘qon-1912”ni bugungi g‘alaba bilan tabriklayman.

Zaxirada qolib ketgan futbolchilar borasida shuni aytishim mumkinki, jamoaga kelganimga ko‘p vaqt bo‘lgani yo‘q. Bugun kimning qanday holatda ekanligini yaxshi bilaman. Muhsin Ubaydullayev jarohatini davolatganiga ko‘p bo‘lmadi. Bundan tashqari, uch oylik karantin. Uni yaxshi bilaman, o‘zini ko‘rsatishiga ishonaman. Turkmanistonlik futbolchilarni ham yaxshi bilaman. Ular bilan Turkmanistonda birga ishlaganman. Balki u futbolchilar jamoaga moslashib ketish uchun vaqt kerak bo‘lar", — dedi Tachmurod Agamurodov.