Bugun Superligada 6-tur o‘yinlari boshlanadi.

Kecha «Bunyodkor» - «Lokomotiv» uchrashuvi oldidan har ikkala jamoa rasmiylari va uchrashuv komissari Sherzod Rajabov ishtirokida o‘yinoldi yig‘ilishi bo‘lib o‘tdi.

Yig‘ilishda ertangi uchrashuvning tashkiliy masalalari, xususan, COVID-19 pandemiyasi davrida cheklash tadbirlarini qo‘llanishi sharoitida professional futbol musobaqalarini tashkil qilish to‘g‘risidagi vaqtinchalik sanitariya-gigiyena qoida va me’yorlariga qat’iy amal qilish bo‘yicha stadiondagi hamda jamoalarning ichki tartibidagi amalga oshirilgan ishlar ko‘rib chiqildi Shuningdek, uchrashuv komissari rasmiylarga jamoalarga qo‘yilgan talablarni yana bir bor eslatib o‘tdi. Qolaversa, tegishli tashkilotlar bilan kelishilgan holda futbolchilarga berilayotgan ayrim yengilliklar haqida ham to‘xtaldi. Xususan, endi uchrashuv vaqtida bosh murabbiylar niqobsiz bo‘lishlari mumkin. Yana bir yengillik shuki, ilgari zaxira o‘yinchilarining uch nafari bir vaqtda yengil mashqlarni bajara olardi. Ertangi o‘yindan boshlab olti nafar zaxira futbolchi maydon chetida mashg‘ulotlarga kirishishlari mumkin. 

Eslatib o‘tamiz, ertaga bo‘lib o‘tadigan «Bunyodkor» - «Lokomotiv» uchrashuvi «Bunyodkor» stadionida 20:15da boshlanadi. O‘yinda «qaldirg‘ochlar» to‘liq ko‘k, «temiryo‘lchilar» to‘liq oq rangdagi liboslarda to‘p suradi.